د ټرانسپورټي خدمتونو او زیربناوو د پراختیا په موخه

د ټرانسپورټ او هوايي چلند سکټور د هېواد د اقتصادي ودې، سوداګریزو اړیکو، د خلکو د تګ راتګ او د سیمه‌ییز اتصال په پیاوړتیا کې مهم رول لري. د دې سکټور پرمختګ په اړوندو برخو کې د مهمو پرژو د پلي کېدو او پيل کيدو تر څنګ په دوامداره څارنه، د چارو پر وخت بشپړولو، د ټرانسپورټي خدمتونو په ښه مدیریت او له اړوندو ادارو او ګاونډیو هېوادونو سره په همغږۍ کولو پورې تړلی دی.

د ټرانسپورټ او هوايي چلند وزیر الحاج ملا محمد فاضل مظلوم په وروستیو میاشتو کې د خپلو کاري لیدنو، ولایتي سفرونو او رسمي ناستو له لارې د همدې موخو د تحقق لپاره بېلابېلې هڅې کړې دي. د پلازمېنه کابل په ټرانسپورټي ترمینلونو کې د روانو رغنیزو چارو له څارنې نیولې، د هرات نړیوال هوايي ډګر د بیارغونې او ساتنې تر پروژو، د حیرتان او شیرخان بندرونو د فعالیتونو تر ارزونې او له ازبکستان سره د ټرانسپورټي همکاریو تر پراختیا پورې، د نوموړي فعالیتونه د دې سکټور د بېلابېلو برخو د پیاوړتیا پر اهمیت راڅرخي.

د ټرانسپورټي پروژو څارنه او پراختیا

د ټرانسپورټي زیربناوو پراختیا د مسافرو او باروړونکو موټرو د تګ راتګ په تنظیم، د ښاري نظم په ښه‌والي او د ټرانسپورټي خدمتونو په معیاري کولو کې مهمه ونډه لري. له همدې امله د روانو پروژو څارنه او د هغوی د کیفیت ارزونه د وزارت له مهمو کاري لومړیتوبونو څخه ګڼل کېږي.

هوايي ډګرونه د هېواد د نړیوالو اړیکو، د مسافرو د لېږد او اقتصادي فعالیتونو مهم ځایونه دي. د هوايي ډګرونو د زیربناوو ساتنه، د ځغاستلیکو معیاري وضعیت او د تخنیکي اصولو رعایت د خوندي او اغېزمن هوايي ټرانسپورټ لپاره اساسي اهمیت لري.

 د ټرانسپورټ او هوايي چلند وزیر الحاج ملا محمد فاضل مظلوم د ۱۴۰۵ل کال د تلې میاشتې په ۲۲مه نېټه په خپل کاري دفتر کې د مالیې وزیر الحاج ملا محمد ناصر اخوند سره د ټرانسپورټي پروژو د پلي کېدو په اړه ناسته وکړه. په دې ناسته کې د یاد وزارت معینانو او یو شمېر رئیسانو هم ګډون درلود. د ناستې په ترڅ کې د ټرانسپورټي او خدماتي پروژو پر وخت او اغېزمن تطبیق، د ښاري نظم او د مسافرو د اسانتیاوو لپاره د ټرانسپورټي هډو او ترمینلونو پر جوړولو او تنظیم، د دواړو وزارتونو ترمنځ د لا ښې همغږۍ او اسانتیاوو پر رامنځته کولو خبرې وشوې.

د دې ناستې موخه دا وه چې د ټرانسپورټي پروژو د پلي کېدو لپاره د اړوندو ادارو ترمنځ همغږي زیاته شي، د چارو پر وړاندې ځينې ستونزې هوارې او شته امکانات په ښه ډول وکارول شي، تر څو پروژې پر وخت او په اغېزمنه توګه بشپړې شي.

له شرکتونو او سوداګرو سره د کاري همغږۍ پیاوړتیا

د ټرانسپورټي خدمتونو د ښه‌والي او د سوداګریزو فعالیتونو د اسانتیا لپاره د خصوصي سکټور همغږي مهم رول لري. شرکتونه او سوداګر د ټرانسپورټي خدمتونو په وړاندې کولو، د بارونو په لېږد رالېږد او د سوداګریزو فعالیتونو په پراختیا کې مهمه ونډه لري. د ټرانسپورټ او هوايي چلند وزیر له بېلابېلو ټرانسپورټي شرکتونو له استازو او سوداګرو سره هم لیدنې ترسره کړې دي. په دغو لیدنو کې د هغوی د فعالیتونو، غوښتنو او اړوندو ټرانسپورټي موضوعاتو په اړه خبرې او د چارو د ښه‌والي لپاره د نظرونو تبادله شوې ده.

له خصوصي سکټور سره دا ډول لیدنې د متقابلې همکارۍ د پیاوړتیا، د شته ستونزو د پېژندلو او د ټرانسپورټي خدمتونو د لا اغېزمن مدیریت لپاره مهمې دي.

له سیمه‌ییزو او نړیوالو هېوادونو سره د اړیکو پراختیا

افغانستان د خپل جغرافیایي موقعیت له مخې د سیمې د سوداګرۍ او ټرانزیټ په بهیر کې مهم ځای لري. له ګاونډیو او سیمه‌ییزو هېوادونو سره د ټرانسپورټي اړیکو پراختیا، د موټرچلوونکو لپاره د اسانتیاوو برابرول او د سوداګریزو توکو د لېږد رالېږد د بهیر ساده کول د سوداګرۍ د ودې او سیمه‌ییز اتصال د پیاوړتیا لپاره مهم فرصتونه برابرولای شي.

د ۱۴۰۵ل کال د زمري میاشتې په څلورمه نېټه د ټرانسپورټ او هوايي چلند وزیر الحاج ملا محمد فاضل مظلوم د ازبکستان د ټرانسپورټ وزیر الهام مخکاموف رستمویچ او مل پلاوي سره ولیدل. په دې لیدنه کې د دواړو هېوادونو ترمنځ د ټرانسپورټي اړیکو د پراختیا، د ټرانزیټي اسانتیاوو د برابرولو او د دواړو هېوادونو د موټرچلوونکو لپاره د ویزو د ورکړې د بهیر د اسانتیا په اړه خبرې وشوې. د ازبکستان د ټرانسپورټ وزیر له افغانستان سره په بېلابېلو برخو کې د دوامدارو همکاریو یادونه وکړه او ډاډ یې ورکړ چې ازبکستان ته د افغان ټرانزیټي وسایطو د تګ راتګ د زیاتوالي لپاره به لا ډېرې اسانتیاوې برابرې کړي. د ټرانسپورټ او هوايي چلند وزیر هم د دواړو هېوادونو ترمنځ د متقابل پرمختګ او همکاریو پر پیاوړتیا ټینګار وکړ او زیاته یې کړه چې د دغو موخو د تحقق لپاره باید عملي ګامونه پورته شي. په پای کې هوکړه وشوه چې د دواړو هېوادونو تخنیکي ټیمونه به د ټرانسپورټي او ټرانزیټي اسانتیاوو د لا پراختیا لپاره ګډې عملي چارې پیل کړي.

د دې ترڅنګ، وزیر صاحب په کابل کې د قطر، ترکیې او ایران له سفیرانو سره هم جلا جلا لیدنې ترسره کړې دي. په دغو لیدنو کې د یادو هېوادونو له استازو سره د اړیکو د پیاوړتیا او د ټرانسپورټ او هوايي چلند په برخو کې د همکاریو د پراختیا په اړه خبرې وشوې. دغه لیدنې د دې څرګندونه کوي چې وزارت د کورنیو ټرانسپورټي خدمتونو او زیربناوو د پراختیا ترڅنګ، له سیمه‌ییزو او نړیوالو شریکانو سره د اړیکو او همکاریو پراختیا ته هم پاملرنه کوي.

له یادو لیدنو څرګندېږي چې د هېواد د ټرانسپورټي خدمتونو د پراختیا لپاره کورنۍ هڅې او له سیمه‌ییزو او نړیوالو هېوادونو سره د همکاریو پیاوړتیا دواړه مهم دي. د ټرانزیټي اسانتیاوو پراختیا له یوې خوا د موټرچلوونکو او سوداګرو لپاره د لېږد رالېږد بهیر اسانه کوي او له بلې خوا د افغانستان او سیمې ترمنځ د سوداګریزو اړیکو د پراخېدو لپاره زمینه برابروي.

له  عاليقدر امیرالمؤمنین^{(حفظه‌الله تعالی)} سره د ترسره شویو فعالیتونو د راپور شریکول

د وزارت د فعالیتونو د تعقیب، د ترسره شویو چارو د راپور ورکولو او د راتلونکو کاري موخو د روښانه کولو په پار د ټرانسپورټ او هوايي چلند وزیر الحاج ملا محمد فاضل مظلوم د خپلو ترسره شویو فعالیتونو او کاري هڅو راپور له امیرالمؤمنین سره هم شریک کړ. په دې راپور کې د وزارت د کاري فعالیتونو، ولایتي سفرونو، د ټرانسپورټ او هوايي چلند پروژو د څارنې، له اړوندو ادارو او نړیوالو استازو سره د لیدنو او د ټرانسپورټي خدمتونو د پراختیا په موخه د ترسره شویو هڅو په اړه معلومات وړاندې شول.

د ترانسپورټ او هوايي چلند سکټور پرمختګ دوامداره پاملرنې، منظمې څارنې، د ادارو ترمنځ همغږۍ او د سیمه‌ییزو همکاریو پیاوړتیا ته اړتیا لري. د وزیر صاحب یادې لیدنې او ناستې د همدې موخو د تعقیب یوه برخه جوړوي؛ هغه موخې چې د تحقق په صورت کې یې د هېوادوالو د ترانسپورټي خدمتونو د کیفیت لوړولو او د افغانستان د ټرانسپورټي او ټرانزیټي ظرفیتونو د پیاوړتیا لپاره مهمې پایلې لرلای شي.